Дистанционное обучение КазНМУ: Расписание предметов

ҚАЗАҚСТАНДА ӨТКЕН 2 ЖЫЛДА 39 МАМАНДАНДЫРЫЛҒАН IT-ЛИЦЕЙ АШЫЛДЫ

Mon, 29 Nov 2021, 06:42 PM

Қазақстанда өткен 2 жылда 39 IT-лицей ашылды. Бүгінде бұл білім ордаларында 55 мыңға жуық оқушы білім алып жатыр.

IT-лицейлер жаңа модификациялық үлгідегі кабинеттермен және заманауи IT құралдармен жабдықталған. Балалар үшін ақпараттық-коммуникациялық технологияларды терең зерттеуге бағытталған арнайы білім беру бағдарламалары әзірленді.

Аталған білім беру бағдарламаларымен 7-11 сынып оқушылары қамтылған. Мамандандырылған IT лицейлерде оқуға ниет білдірген білім алушылар түсу емтихандарын тапсырады.

Оқушылар бағдарламалау дағдылары, 3D дизайн, робототехника және басқа да бағыттар бойынша білім алады.

Осындай лицейлердің ашылуы, жаңа білім беру бағдарламаларын енгізу, сондай-ақ педагогтердің қолдауының нәтижесінде IT-лицейлердегі білім алушылар цифрлық стартаптар құрып, өз жобаларын әзірлеп жатыр. Сонымен бірге Қазақстанды әлемдік аренада лайықты деңгейде танытып келеді.

Мысалы, Көкшетау қаласындағы IT-лицейдің оқушысы Caspian Start-UP 2021 Халықаралық ғылыми жобалар байқауында жеңіске жетті. Байқауға Каспий маңы елдерінен 90-ға жуық оқушы мен колледж студенттері қатысты. Жас дарын иелері инновациялық технологиялар саласындағы өздерінің авторлық жобаларын таныстырды.

«Елімізде осындай мамандандырылған IT-лицейлердің ашылғанына қуаныштымын. Нәтижесінде біз барлық цифрлық технологияны сапалы түрде зерттейміз. Мәселен, мен стартаптар байқауында өзімнің авторлық жобамды таныстырдым. Маған көмектескен мұғалімдерім мен ғылыми жетекшіме алғысым шексіз. Қол жеткізген жетістіктерім лайықты бағаланып, білім беру грантын алғаныма қуаныштымын», – деді Caspian Start-UP 2021 жеңімпазы Асылхан Қошанов.
ҚР Білім және ғылым министрлігінің апталық жұмысына шолу

Sat, 27 Nov 2021, 04:51 PM

Асхат Аймағамбетов Қырғыз Республикасының елшісі Дастан Дюшекеевпен кездесті
Кездесуде Қазақстан мен Қырғызстан арасындағы қолданыстағы келісімге өзгерістер енгізу туралы мәселелер талқыланды. Квоталық орындарды қырғыз азаматтары үшін 50-ге дейін, қазақстандық азаматтар үшін 10-ға дейін ұлғайту барысы қаралды.иСондай-ақ әл-Фараби атындағы Қазақ ұлттық университетінің филиалын Бішкек қаласында ашу мәселесі қарастырылды. Кездесу соңында тараптар білім және ғылым саласында өзара белсенді іс-қимыл жасауға және ынтымақтастықты одан әрі нығайтуға келісті.

Асхат Аймағамбетов Түркістан қаласында «Халықаралық «Қазақ тілі» қоғамы» қоғамдық бірлестігінің VI Құрылтайына қатысты
Ауқымды жиында депутаттар, зиялы қауым өкілдері, қоғам қайраткерлері, тіл жанашырлары бас қосты. ҚР Мемлекеттік хатшысы Қырымбек Көшербаев бұдан былай тіл мәселесімен айналысатын Мемлекеттік комиссия құрылатынын жеткізді. Құрылтайда қоғамның атқарған қызметі бойынша оның Орталық Кеңесінің есебі талқыланды. Сондай-ақ қоғамдық бірлестіктің алдағы бес жылға арналған бағдарламасы, жаңа редакцияда жазылған Жарғысы қабылданды. Делегаттардың ашық дауыс беруі арқылы «Халықаралық «Қазақ тілі» қоғамы» қоғамдық бірлестігінің жаңа Президенті болып ҚР Парламенті мәжілісінің депутаты Берік Әбдіғалиұлы сайланды. Халықаралық «Қазақ тілі» қоғамы вице-президенттері болып, Тіл институты директоры Анар Фазылжанқызы мен Максим Рожин сайланды. Құрылтай барысында бірқатар тіл жанашыры «Барыс», «Парасат», «Құрмет» ордендерімен марапатталды.

«БҒМ LIVE» айдарында магистратура мен докторантураға түсу үшін құжаттарды қабылдау науқанының қорытындысы туралы ақпарат ұсынылды
Facebook, Instagram әлеуметтік желілерінде өткен тікелей эфирде білім беру гранттарын қаржыландыру жүйесіндегі өзгерістер айтылды. Оқырмандардың сұрақтарына ҚР Білім және ғылым вице-министрі Қуаныш Ерғалиев жауап берді
ЖОҒАРЫ ОҚУ ОРЫНДАРЫНА ТҮСУГЕ АРНАЛҒАН БІЛІМ БЕРУ ГРАНТТАРЫ ЖАҢА КҮНТІЗБЕЛІК ЖЫЛ БАСТАЛҒАНҒА ДЕЙІН БЕКІТІЛЕТІН БОЛАДЫ

Fri, 26 Nov 2021, 11:16 PM

Қазақстанда жоғары оқу орындарына түсу үшін білім гранттары жаңа күнтізбелік жыл басталғанға дейін бөлінеді.

Жоғары оқу орындары арасында мемлекеттік тапсырысты орналастыру конкурсы 2021 жылғы 29 қарашада басталады.

Білім беру гранттарын орналастыру мерзімдерін өзгерту барысында талапкерлердің де, жоғары оқу орындарының да мүдделері ескерілді.

Енді талапкерлер қай жоғары оқу орындарына және қандай мамандықтар бойынша гранттар бөлінгені туралы ертерек хабардар болады. Ал жоғары оқу орындары қабылдау науқаны бойынша жұмысты алдын ала жоспарлауға мүмкіндік алады.

Бұрын-соңды жоғары және жоғары оқу орнынан кейінгі білім беру ұйымдарында кадрлар даярлауға, сондай-ақ дайындық бөлімдеріне мемлекеттік білім беру тапсырысын орналастыруға арналған конкурс мамыр-маусым айларында жарияланатын, яғни білім грантына құжаттарды қабылдау басталғанға дейін. Жоғары оқу орындары арасында мемлекеттік тапсырысты бөлу жөніндегі комиссия да сәуір-мамыр айларында құрылатын.

Енді 2022-2023 оқу жылына арналған білім беру бағдарламаларының топтары бөлінісінде мемлекеттік тапсырысты орналастыру конкурсы осы жылдың 29 қарашасы мен 3 желтоқсаны аралығында өтеді.

«Мұндай шешімдерді қабылдау кезінде, бірінші кезекте, біз талапкерлеріміздің мүдделерін ескереміз. Енді оқуға түсушілер университет пен мамандықты алдын-ала таңдай алады. Яғни, ҰБТ тапсырар алдында талапкерлер қандай жоғары оқу орындарына және қандай мамандықтар бойынша білім гранттары бөлінгенін білетін болады. Талапкерлер үшін неғұрлым қолайлы жағдай жасауға бағытталған шешімдер алдағы уақытта да қабылданатын болады», — деп атап өтті Білім және ғылым вице-министрі Қуаныш Ерғалиев.

Жоғары оқу орындарында мемлекеттік тапсырыс білім берудің барлық деңгейі – бакалавриат, магистратура және докторантура бойынша орналастырылатын болады. ЖОО-лар конкурсқа қатысуға өтінімді, сауалнама, ақпараттық карта және мемлекеттік тапсырысты орналастыру бойынша ұсыныстарды Ұлттық тестілеу орталығының сайтында https://infomap.testcenter.kz сілтемесі бойынша толтыра алады.
ҚАЗАҚСТАНДЫҚ ҒАЛЫМДАР МЕДИЦИНАЛЫҚ ҚАЛДЫҚТАРДЫ ЖОЮДЫҢ БІРЕГЕЙ ӘДІСІН ОЙЛАП ТАПТЫ

Thu, 25 Nov 2021, 10:57 PM

Әл-Фараби атындағы Қазақ ұлттық университетінің ғалымдары биомедициналық қалдықтарды жоюдың инновациялық әдісін ойлап тапты. Отандық ғылыми зерттеушілер әзірлеген қалдықтарды қайта өңдеудің плазмалық технологиясы мен плазмохимиялық реактордың әлем бойынша баламасы жоқ. Әзірлемелер арнайы патенттермен қорғалған.

Қалдықтарды жоюдың плазмалық технологиясының бірегейлігі оның биомедициналық қалдықтарды толық термиялық залалсыздандыруға мүмкіндік беретіндігінде болып отыр. Бірегей технологияның нәтижесінде өңдеу тиімділігі артып, процеске энергия аз шығындалады.

Қалдықтарды жоюдың плазмалық технологиясы биомедициналық қалдықтарды сұрыптаусыз қайта өңдеуге мүмкіндік береді.

Айта кетейік, COVID-19 індетіне байланысты Қазақстанда және жалпы әлем бойынша биомедициналық қалдықтардың көлемі тұрақты негізде артып келеді. Медициналық маскалар, қолғаптар, бахилалар, қорғаныс комбинезондарын және басқа да медициналық құралдарды пайдаланғаннан кейін қалған қалдықтарды жою мәселесі бұрынғыдан да өзекті болып отыр. Инфекцияланған жоғары уытты медициналық қалдықтар адам денсаулығы үшін де, қоршаған орта үшін де қауіпті. Осыған байланысты қазақстандық ғалымдар медициналық қалдықтарды қайта өңдеудің ең тиімді және экологиялық әдісін ойлап тапты.

«Қалдықтарды жоюдың плазмалық әдісінің қолданыстағы технологиялардан басты айырмашылығы – жоғары температуралы плазмалық алаудың пайдаланылуында. Ол кез-келген органикалық және бейорганикалық қосылыстарды ыдыратады. Сонымен қатар плазмадағы күрделі қосылыстардың жойылуы оттегісіз тиімді жүреді. Медициналық қалдықтарды жағу әдістерімен салыстырғанда плазмалық ыдырату технологиясының бірқатар маңызды артықшылығы бар. Атап айтсақ, реактор көлемінің жоғары өнімділікпен 6-8 есе азаюы, қажетті өндірістік үй-жайлардың ауданын қысқарту, бөлінетін газдар көлемінің тәртібін төмендету. Плазмохимиялық реактордағы қалдықтарды өңдеу 2000 К дейінгі температурада жүреді. Бұл минералды қалдықтың еруін жақсартады және улы компоненттердің пайда болуына жол бермейді», – деді Әл-Фараби атындағы ҚазҰУ эксперименттік және теориялық физика ғылыми-зерттеу институтының бөлім меңгерушісі Александр Устименко.
ҚАЗАҚСТАНДЫҚ КОЛЛЕДЖДЕРДЕ 50 МАМАНДЫҚ БОЙЫНША ОҚЫТУ ТОҚТАТЫЛДЫ

Thu, 25 Nov 2021, 06:26 PM

Білім және ғылым министрлігі сұранысқа сай келмейтін 50 мамандық бойынша колледждерге қабылдауды тоқтатты.

Ведомство техникалық және кәсіптік білім беру (ТжКБ) мамандықтары мен біліктіліктерінің жаңа сыныптауышын әзірлеп, бекітті. Өзгерістер колледждерде оқытылатын мамандықтар еңбек нарығының қазіргі сұраныстарына сәйкес келуі үшін жасалған.

Ендігі кезекте оқу процесіне сұранысқа ие мамандықтар бойынша жаңа білім беру бағдарламалары енгізіліп жатыр.

Мәселен, қазақстандық колледждерде сынама іріктеуші, шам жасаушы, гувернер, заңгер-консульт және тағы басқа мамандықтар бойынша қабылдау тоқтатылды.

Сондай-ақ жіктеушіден «Білім беру ұйымының зертханашысы», «Патенттану» және басқа да мамандықтар алынып тасталды.

«Біздің басты мақсатымыз – білім беру бағдарламалары мен оқытылатын мамандықтарды жұмыс берушілердің заманауи сұраныстарына сәйкестендіру болып табылады. Сондықтан біз үлкен талдау жұмыстарын жүргізіп, еңбек нарығына мониторинг жүргіздік. Жұмыс берушілермен және салалық қауымдастықтардың өкілдерімен кездестік. Олардың ұсыныстарын ескере отырып, мамандықтар жіктеуішісін жаңарттық. Енді қазақстандық колледждерде «Робототехника және ендірілген жүйелер», «Наноматериалдар негізіндегі бұйымдар технологиясы», «Өндірістің аддитивті технологиялары», «Қашықтан басқарылатын авиациялық жүйе», «Ғимараттарды жобалау мен пайдаланудың автоматтандырылған жүйелері», «Жылыжай шаруашылығын ұйымдастыру», «Графикалық және мультимедиялық дизайн», «Тас өңдеу өндірісі», «Ландшафтық дизайн», «Жылжымайтын мүлікті басқару», «Дестинацияны басқару», «Құрылыстағы сметалық іс», «Еңбекті қорғау және технологиялық процестердің қауіпсіздігі» және басқа да жаңа мамандықтар оқытылады», – деп атап өтті ҚР БҒМ Техникалық және кәсіптік білім беру департаментінің директоры Насымжан Оспанова.